अहमदनगर जिल्हा सहकारी बँकेच्या अध्यक्षपदी माजी आमदार शिवाजीराव कर्डिले यांची निवड झाली आहे. जिल्हा सहकारी बँकेच्या अध्यक्षपदासाठी भाजपचे शिवाजीराव कर्डिले आणि महाविकास आघाडीचे चंद्रशेखर घुले यांच्यात लढत झाली. शिवाजीराव कर्डिले एका मताने विजयी झाले.
शिवाजीराव कर्डिले यांच्या विजयामागे पालकमंत्री राधाकृष्ण विखे आणि खासदार सुजय विखे यांचा मोलाचा वाटा होता. शिवाजीराव कर्डिले यांच्या विजयाबरोबरच काँग्रेसचे नेते व माजी महसूलमंत्री बाळासाहेब थोरात यांचे वर्चस्व असलेली जिल्हा सहकारी बँक आता विखे म्हणजेच भाजपच्या ताब्यात आली आहे.
अहमदनगर जिल्हा सहकारी बँकेच्या अध्यक्षपदासाठी अखेरच्या क्षणी भाजपने शिवाजीराव कर्डिले यांचा अर्ज दाखल केला. त्यामुळे निवडणुकीत बराच गोंधळ उडाला होता. ही निवडणूक सशर्त होईल, असे चित्र निर्माण झाले. कर्डिले यांच्यासह विखे पिता-पुत्रांनी ही निवडणूक सन्मानजनक केली. आणि विजयाचे गणित जुळवून घेतले.
अहमदनगर जिल्हा सहकारी बँकेच्या अध्यक्षपदी मतदानाने निवड करण्यात आली. या निवडणुकीत शिवाजीराव कर्डिले यांना दहा मते मिळाली. चंद्रशेखर घुले यांना नऊ मते मिळाली. एक मत फेटाळण्यात आले.
